ସ୍ବପ୍ନ ଆଖିରେ ଦେଖିବା ଆଗରୁ
ଦିଅ ତୁମେ ମୋତେ ମାରି
ସ୍ବାଧିନ ଭାବେ ବଞ୍ଚିବି କେମିତି
ବୋଝ ଯେବେ ଦିଅ କରି।
ମହିଳା ସମିତି ଲଗାଏ ନାରା
ନିଜର ସୁରକ୍ଷା ପାଇଁ
ରକ୍ଷକ ସାଜିଛି ଭକ୍ଷକ ଆଜି
ରକ୍ତ ମାଂସ ମୋର ଖାଇ।
ଝିଅ ତୁମର ଲକ୍ଷ୍ମୀମନ୍ତ ନୁହେଁ
ନୁହେଁ ସରସ୍ବତୀ ଖାଲି
ଚାହଁ ଯଦି ତାକୁ ବଞ୍ଚାଇବାକୁ
ବନାଅ ତେବେ କାଳୀ।
ସଂହାର ପାଇଁ ଶକ୍ତି ଦିଅ ତୁମେ
ଶାସନ ଦିଅ ମୋ ହାତେ
ଲୁହ କୁ ମୋର ଲହୁ କରିଦିଅ
ତ୍ରିଶୂଳ ଧରାଅ ମୋତେ।
ଚାରି କାନ୍ଥ ବନ୍ଧା ଆଇନ ତୁମର
ପ୍ରଶାସନ ଲୋଡା ନାହିଁ
ସତୀତ୍ୱ ଆଜି ବିନାଶ ଚାହୁଁଛି
ମାନବ ପଶୁଟେ ପାଇଁ।
ସହ-ସମ୍ପାଦିକା
ପୁଷ୍ପଲତା ଦିଗାର
ବାରିପଦା, ମୟୂରଭଞ୍ଜ
